KAUAI

15. - 19.8.2010

Die groeschti Heruseforderig bes jetz hed ues uf dere Ensle erwartet.
Bi stockdonkler Nacht si mer en Lihue acho ond hei ues vom schwatzhafte Taxifahrer ned es reservierte Hotel, sondern enes Hostel lo fahre.
(Begroendig Taxifahrer: Hotel = Lage in Ghetto & unsicher, Hostel = Strandlage, preiswert, in Shoppingzone)
Met Vorfreud acho, esch de oeisi Stemmig bim Ableck vo de 'Schlofhalle' schnaell de Bach ab. Flochtartig hei mer die wandlosi Halle weder verloh. Es esch meh es Asylanteheim als es Hostel gsii. Mer als Wiissi si vo de iheimische 'Hallebewohner' vo obe bes onde gmoschteret worde ond waere wahrschinlech es gfondnigs Fraesse gsii.
Zom Gloeck hei mer uf oeisere Flocht d Ingrid (en Duetschi) troffe. Woeu se d Omstaend e daem Hostel scho saelber erlaebt hed, hed se oeis sofort e ehres Auto packt ond oeis zu oeisem eigentlech reservierte Hotel gfahre. So esch doch no alles guet cho.
...a propo: Jo, mer woesses saelber!! Mer si scho chli naiv gsii... Aber dae Faehler passiert oeis gwoess ned no einisch.. ond jo: der doerfet lache ;-)
Au Kauai esch soesch eher en ruhigi Ensle. Zom echli d Ensle choenne z erkonde, hei mer es Auto gmietet. So hei mer au doert vell schoeni Idroeck gwonne: Vo tropische Waelder, oeber Wasserfaell, Straend ond en Canyon.
S Highlight esch de d Katamaran-Tour a de Napali Coast entlang gsii. Mer hei sogar Delfine gseh ond si em Meer go schnorchle. Fazit noch 1 Stond: 1 farbige ond es paar graui Fesche.
Woeu oeis s Schnorchle aber sehr guet gfalle hed, esch das secher ned s letschte Mol gsii.

BIG ISLAND

13. - 15.8.2010

Hmm, dae Abstaecher uf die groeschti Ensle esch de choerzischt gsii.
Uesi Onterkonft esch es ruhigs, gmuetlechs Hostel en Kilua-Kona gsii.
S Sehenswaerte vo dere Ensle send foer oeis de Vulkan ond die verschede farbige Straend gsii.
De 1-taegig Usflog ufene Vulkan esch raecht abentuerlech gsii. Nach 2 Stond wandere ufem Vulkan hei mer tatsaechlech dae Ponkt gfonde, wo die fluessendi Lava ufs Meer trefft.
Auso: Danke Philipp foer dini Waegbeschriibig. Mer woesse, dass die meischte Luet ned e dae Gnoss choeme, das Naturspektakel met eigene Auge choenne z erlaebe ;-)
Mer hei dae Momaent gnosse, aber ned allzu lang do oeisi Schuehsohle uf de no warme Lava doch en Metleideschaft zoge worde send (= Profil leicht geschmolzen).
..a propo: oeb das Ganze ongfaehrlech ond legal gsii esch, woesse mer bes hoet no ned...
Nach daem Erlaebnis send mer en Rechtig Mauna Kea wiiter. Doert esch en Staernwarte, wo me met oder ohni Teleskop de Staernehemmel cha beobachte. Dae Ableck cha me ned a vellne Plaetz uf dere Aerde so gniesse wie doert.

OAHU - Honolulu, Part 1

10. - 13.8.2010


Aloha!
Met dene Wort send mer scho am Floghafe en Oahu haerzlech begruesst worde.
D' Art ond d'Laebenswiis uf dere Ensle ond em Polynesian Hostel send oeis grad as Haerz gwachse. Es esch wie me sech Hawaii vorstellt: Easy Lifestyle, Sonne & Strand.
Mer hei super Luet kenneglehrt, de Waikiki Beach erkondet ond met em Bsuech vo Pearl Harbour au oepis Kulturells erlaebt.
...a propo Pearl Harbour: Dae ganzi Usflog hed 6 Stond duuret ond eigentlech s Einzige wo mer debii gseh hei, esch e Bleck of das 'fucking piece of metal' em Wasser vomene versonkene Scheff(Zitat Lukasz).
Anyway: Mer hei Pearl Harbour gseh ond es esch en amuesante Usflog gsii.
Mer froeie oeis scho jetz uf Honolulu Part 2.

San Francisco

Am Donschtimorge am 6i esch oeisi Reis losgange.

Am Floghafe hei mer erfahre, dass mer zwar es 'Round-the-world-ticket' hei, aber trotzdaem niene Setzplaetz foer oeis reserviert send.

Do dae erschti Flog  vo Zoeri uf NY au no oeberbuechet gsii esch, send oeisi Setzplaetz  ede Staerne gstande ond mer send chorzom chli es schwetze cho.

Gloecklecherwiis haend mer de (dore Lutspraecher usgrueft) erfahre, dass mer doch met oeisere Reis choei starte.

Noch uesere erschte Nacht en San Francisco hei mer gmerkt, dass si oeis em Hostel komplett abzockt haend. Do mer onder dene Omstaend uf kei Fall laenger hei welle doert bliibe, hei mer 5 Stond lang em usbuechte San Francisco nochere andere Oebernachtigsmoeglechkeit gsuecht. 

Wo mer de aendli en Onterkonft gfonde hei, haend mer em Hostel so lang es Theater ufdo & met em Raechtsschotz droht, bes mer oeises Gaeld (ond no chli meh :-) ) zrog becho hei.

Jetz gniesse mer San Francisco en volle Zoeg: Sightseeing, Kaefele, shoppe ..ond alles was dezue ghoert. Dae Zwoeschestop e dere tolle Stadt hed sech glohnt!

Next stop: Dienstag, 10.8.2010 Hawaii

So, glii gohts los e die grossi wiiti Wält!

Langsam (aber doch noni ganz) hämmer öisi 7 Sache zäme (ond de mixer & d stögelischueh bliibe definitiv dihei) ;-)

Gärn düemer es paar vo öisne Erläbnis ond Iidröck uf däm blog feschthalte ond fröie öis,
wenn der zwöschedore mol inelueget. So chöne mer öich nämli uf de reis emmer echli met debii ha.