AUSTRALIEN

22.9. - 22.10.2010

Noch de erschte paar Tag en Cairns hei mer uese Wicked-Van, metem Pink Panther drof, abgholt. Mer send de zersch en Rechtig Norde, nach Port Douglas, gfahre, damet mer doert met em Boot hei choenne s farbepraechtige Great Barrier Reef erkonde.
Am drette Tag onterwaegs metem Campervan hed oeis oeise 'Pinky' scho s'erschte Mol em Stech gloh. Gloeck em Ongloeck: trotz emne platte Reife zmets ufem Highway bi voller Gschwendigkeit esch oeis osser emne komplett demolierte Reife ond eme grosse Schreck nuet passiert ..ond e Schotzaengu wo oeis zmets em Nirgendwo de Reife gwaechslet hed, esch e Minute spoeter au grad zor Stell gsii.
D'Angscht esch de die noechschte paar Tag no chli metgfahre, aber bim Ableck vom Mission Beach (wo halt s Fiji-feeling glich ned ganz loht lo ufcho) ond em Bsuech en Townsville, hei mer de dae Schreck chli choenne vergaesse.
Bi uesem noechschte Stop en Airlie Beach hei mer de Strand, de Usgang (noeie Bierrekord!!) ond s schoene Waetter gnosse, bevor de Sailingtrip zu de Whitsundays ufem Programm gstande esch. Dae esch leider chli ed Hose. Anstell vom Bsuech vom traumhafte Whiteheaven Beach semmer, dank em wonderbar stoermische Waetter, drue Tag seechrank ufem Boot feschtgsaesse (ond das ohni Duschi & fluessend Wasser).
Anyway...en Erfahrig esches waert gsii.
Nach dene turbulaente Taeg hei mer ues en McKay emene Beachhouse super erholt (..ond stondelang duschet).
Bim Zwoeschestop en Gladstone bliibt oeis d Begaegnig met de Nicole & em Tek ond em gmeinsame Bsuech binere aechte Aboriginie-home-party beschtens en Erennerig ;-)
In Agnes Water / Town 1770 hend mer naebem Bsuech vom Strand au em Bikinishop stondelang choenne verwiile.
En Noosa (s'Monaco vo Australie) hei mer zwoei Tag ufeme schoene Campingplatz diraekt am Strand verbrocht ond e Spaziergang dore Nationalpark gmacht.
Leider hed de s Waetter omgschlage wo mer uf Brisbane cho send. Rekordraegefaell - das send d Hauptschlagziile vo de Zitige gsii. Ond dementspraechend nass hei mer Brisbane erlaebt...somet esch halt shoppe ond kaefele ufem Programm gstande.
Au Surfers Paradise hei mer nor bi Raege, Wend & riesige Waelle gseh.
Zom Gloeck esches denn weder chli waermer worde, wo mer in Byron Bay acho send.
Byron Bay esch es haerzigs Staedtli wo iladt zom Ziit verbrenge. S gmeschte Volk ond die gmuetlechi Atmosphaere haend oeis uf aheb gfalle & em Usgang hei mer sogar uf de Tesche tanzet. Die gueti Stemmig esch de dor oeise Pinky-Van chli truebt worde. Scho d Woche vorhaer hed er gmacht, was er hed welle ond en Byron Bay esch de gar nuet me gange.
Nachem Zwoeschestop ede Waerchstatt hei mer de die letschte knapp 800km Waeg nach Sydney en Agreff gno.
In Taree hei mer die letscht Nacht, bevor mer de Van weder abgae hei, gnoetzt zom weder mol waesche ond stondelang oeises aghuefte Chaos z sortiere. Das esch oeis (dankeme Koffer meh) glonge ond somet semmer parat gsii foer Sydney.
Die letschte gmeinsame Tag hei mer em Wake-up Hostel zmets ede Stadt zaeme verbrocht. Die superschoeni Stadt ond d Sonne wo mer aendli weder mol gfonde hei, haend mer e volle Zoeg gnosse. Au d Sehenswoerdigkeite vo Sydney hei mer oeis ned lo entgo. Mer hei s Operehuus, d Harbour Bridge, de Sydney Tower, Darling Harbour ond veles meh bsuecht. Au em Wildlife World semmer gsii, damet mer naeb all denen tote Tier am Strosserand au no es paar laebigi Exemplar gsaehnd.

Dankbar, zfrede ond wohluf goht jetz oeisi gmeinsami Ziit am Aendi entgaege.
E schwaere Rocksack voller schoener & onvergaesslecher Erennerige ond Erlaebnis naeme mer uf oeise wiiter Laebeswaeg met...